Aquí podes consultar a nosa proposta gastronómica, así como información concreta das reservas e preguntas frecuentes.
Como novidade, dispoñemos dun novo espazo para aloxamento e desconexión a 5 minutos do noso restaurante: Dormideira
Temos os nosos 5 sentidos atentos ao que nos rodea, para traer á nosa cociña o mellor produto no seu mellor momento.
Despertar os sentidos, evocar recordos. Olores, sabores, formas… que conecten coas emocións e perduren na memoria.
Cada tempada é única e cada produto efémero, e irrepetible.
É verán en Culler de pau.
Menú
Menú DESCUBERTA
E agora que?
Descuberta representa o camiño de Culler na actualidade: curiosidade, descubrimento.
Unha mirada atenta á nosa contorna, onde nos deixamos sorprender polo que nos ofrece a terra atlántica, polos seus ritmos.
Mira, escoita, cheira, saborea… É posible que todo o que te rodea estea aquí:
4 aperitivos, entre 13 e 15 pratos, 1 pre sobremesa e 2 sobremesas.
O menú máis longo e máis innovador.
Prezo menú: 225,00 € por persoa.
Maridaxe: 90,00 por persoa, opcional.
Os menús serviranse por mesa completa. Poden variar por cuestións de mercado, pero sempre mantendo a mesma estrutura.
Menú MAREXADA
Navegamos entre a memoria e o contemporáneo.
Percorremos o máis tradicional e o máis innovador de Culler en:
4 aperitivos, 7 pratos, 1 pre sobremesa e 2 sobremesas.
Prezo menú: 190,00 € por persoa.
Maridaxe: 75,00 € por persoa, opcional.
Os menús serviranse por mesa completa. Poden variar por cuestións de mercado, pero sempre mantendo a mesma estrutura.
Menú RONSEL
Lembras?
Sabores que deixan un rastro no noso padal, que evocan recordos, que permanecen.
O menú máis curto cos pratos máis clásicos de Culler:
5 aperitivos, 4 pratos e 2 sobremesas
Prezo menú: 170,00 € por persoa.
Maridaxe: 60,00 € por persoa, opcional.
Os menús serviranse por mesa completa. Poden variar por cuestións de mercado, pero sempre mantendo a mesma estrutura.
A proposta responde aos sinais que nos vai marcando a natureza en cada tempada, buscando sempre a frescura, a estacionalidade e o equilibrio.
Horario
De setembro a xuño, o noso horario de apertura é de xoves a luns de 13:30 a 15:00 h. (os venres e sábados tamén abrimos en horario de cea, de 21:00 a 22:00 h.). O mes de febreiro permaneceremos pechados por vacacións.
Os meses de xullo e agosto, abrimos de mércores a luns para xantares e ceas (excepto os luns pola noite e martes; durante o mes de xullo. En agosto o restaurante permanecerá pechado os martes por descanso.
Reserva
Unha vez feita a reserva, recibirás unha confirmación por correo electrónico ou SMS; se non a recibes, non dubides en contactar con nós para que poidamos solucionalo canto antes.
O menú Descuberta, o máis extenso, só se servirá ata as 14h. (ao mediodía) e ata as 21h. (cea).
O menú Marexada ata as 14:15 h. (mediodía) e ata as 21:15h. (cea).
Para calquera consulta, podes contactar con nós por correo electrónico ou teléfono:
Preguntas frecuentes
PODO VIR SEN RESERVA?
É necesario reservar previamente, xa que a capacidade é limitada.
Se non atopa dispoñibilidade na nosa web pode consultar se hai cancelacións de último minuto a través do noso teléfono 986732275 ou enviando un email a reservas@cullerdepau.com
SON ALÉRXICO, INTOLERANTE, NON BEBO ALCOL OU ALGÚN INGREDIENTE NON ME GUSTA
Se ten algunha restrición alimentaria, o mellor é que nos comente as súas peticións no momento de facer a reserva.
Adaptarémonos na medida do posible ás súas necesidades.
No caso de formar parte dunha mesa grande, consulte cos seus acompañantes e avísenos polo menos 24 horas antes para preparar as súas alternativas.
HAI OPCIÓN VEXETARIANA OU VEGANA?
Debido ás características do noso menú poderá ser adaptado a opcións veganas o menú Ronsel, para unha proposta vexetariana poderá ser adaptado o menú Marexada e o Ronsel.
CANTO TEMPO SE TARDA EN COMER?
O tempo é moi variable dependendo da calma e o desfrute co que se queira vivir a experiencia, pero como orientación cada menú dura o seguinte:
- DESCUBERTA 3 horas e media.
- MAREXADA 2 horas e media.
- RONSEL 1 hora e media
No entanto, se ten menos tempo, fáganolo saber con antelación e adaptarémonos.
PODO VIR ACOMPAÑADO DUN MENOR?
Non restrinximos as reservas con menores, pero non dispoñemos dunha área lúdica para eles, aconsellámoslle que o teñan en conta ao elixir o seu menú debido á súa duración para que todos poidan gozar comodamente. Se asiste cun bebé é importante comunicárnolo para organizar a distribución das mesas no comedor. Na súa mesa poderemos situar unha trona (baixo dispoñibilidade). Se asiste cun carriño de bebé agradecémoslle que acceda pola planta superior a nivel de rúa, o acceso desde o aparcadoiro non conta con ascensor.
QUE PASA SE CHEGO TARDE?
Pregamos que sempre nos avisen en caso de chegar tarde, intentaremos adaptarnos á situación en función do tempo de demora, lembre que o menú Descuberta, o máis extenso, só se servirá ata as 14h. (ao mediodía) e ata as 21h. (cea).
CAL É O CÓDIGO DE VESTIMENTA?
Non temos un código de vestimenta ríxido, unicamente solicitámoslle que evite vestimenta de praia.
DISPOÑO DUN BONO, DEBO CUBRIR A POLÍTICA DE ANULACIÓN COA MIÑA TARXETA?
O feito de dispor dun bono convérteo en beneficiario de poder gozar dalgún dos nosos tres menús designados no mesmo. Non obstante, debe garantir a súa reserva cubrindo igualmente o proceso que se solicita na política de anulación. Dispón de 24 horas previas á súa reserva para poder modificar ou anular a mesma.
PERSOAS CON MOBILIDADE REDUCIDA
O acceso para persoas con mobilidade reducida atópase na entrada principal, a nivel de rúa. Se precisa que o axudemos non dubide en solicitárnolo.
