As nosas propostas

buscan espertar os sentidos e conectalos coas emocións, tan doado e tan complicado como iso. Procurámolo creando ‘experiencias gustativas’ -así é como nos gusta denominalas-, cheas de matices, en aparencia efémeras pero perdurables na memoria culinaria. Para iso cremos indispensable a excelencia no produto. Cociñamos aquilo que nos ofrecen a horta, a lonxa, os bosques, os provedores de confianza… Eles marcan o ritmo dos nosos pratos.

Produtos de tempada, con dimensión propia, maduración lenta e específica do noso ámbito, porque cremos que o mellor non é, nin moito menos, senón o que está no seu mellor momento, contribuíndo á sostibilidade, outro dos nosos puntos de partida.

A carta de Culler ten, non obstante, continuos acenos a algúns produtos, receitas e ata conceptos fetiche: o verán é tempo de peixe azul, de espárragos brancos, de chichariños e de tomates; o outono, de cogomelos e de humidade; o inverno, de caldos e de pucheiros, pratos de culler que nos fascinan, e a primavera, dunha variedade impresionante de herbas e brotes. Con todo iso, cada tempada é totalmente diferente á anterior e así, interpretamos un territorio e poñémolo en valor a través da creatividade e cociñando as estacións.

Nos nosos pratos queremos que prime o equilibrio: de sabores, de cores, de coccións, de texturas… sensacións que conformen un menú contemporáneo sinxelo, saudable, con resultados belos, harmoniosos e dinámicos. Pratos con alma que esperten todos os sentidos e emocionen.

Buscamos alimentar non só o estómago, senón tamén a curiosidade, o desexo a través dunha cociña sincera, divertida e consecuente, e facémolo aplicando a experiencia acumulada en tantas e tantas horas de cociña, xunto coas propias experiencias vitais que enriquecen sempre as mensaxes culinarias de Culler.